Di seguito tutti gli interventi pubblicati sul sito, in ordine cronologico.
 
 

Nuie Pulicinella Cetrulo, rappresentante de lo popolo vascio napoletano, facimmo acconoscere a lo Direttore de la Fraveca de li Tabbacche, ca li sicarre so arrevate a ll'urdemo stato de porcaria e non se ponno fumà cchiù, comme pure lo tabbacco che s'accatta no poverommo pe se fumà na pepparella è tutto chino se struppune e de fronne de scarola, cappucce e ttorze. E ccomme, s'ànno da sentere sempe le llagnanze de li poverielle, senza ca chille che stanno a lo commanno de n'Amministrazione pensassero a lo bene de lo simile lloro?! Pensate ca no rano che spenne nu poverommo nc'esce lo sango da dinto, pecché è frutto de la fatica de na jornata e quanno chisto vede che li denare li ghietta mmiezi a la via non po' certamente dicere bene de chille che stanno a lo comanno de n'amministrazione. Penzate che vuie site pavate da lo popolo, che li denare che ve pigliate ogne fine mese li spennere a ffeste, festine, tavolelle e carrozze, è denaro che esce da cuollo a lo popolo; e vvuje site li serviture suoje e comm'a ttale avite da fare l'interesse suoje, si no tanta chiacchiare ve decimmo e tanto ve ne cantammo, ca ve ne facimmo retirà co na vranca de mosche mmano e co na fanfarra de vernacchie e ssische. Onne, conchiudimmo; date subeto ll'ordene ca se facessero li sicarie comme s'ànno da fa, facite ca li mpiegate mmece de jre cammenanno e redenno pe la fraveca stessero attiente a lle femmene che ffaticano, pecché, ve lo tornanmmo a dicere, lo popolo napolitano non sta a lo stato de spennere li denare suoje e ghiettarle. Nce simmo ntise? Sperammo ca non nce facite torna n'autra vota a ccoppa, ca sarà peggio pe bbuje!!! PULICINELLA E LO DIAVOLO ZUOPPO, 29 LUGLIO 1861.