Di seguito tutti gli interventi pubblicati sul sito, in ordine cronologico.
 
 

Dinto a lo vico de la Nnoglia, a li Malesciente, e propetamente da coppo a le Pentite de la via de Santo Rafaelo, nc’è stata nsi ajere na fattocchiara che sape addevenà la ventura e sanà ogne malatia pe no granillo. Povera scasata! Li signure n’hanno avuto mmidia e l’hanno mannato a dì ca si non s’accordava co lloro, l’avarriano fatta levà poteca e spennere le vvalenzelle da vicino a le mura. La paura ha fatto fa st’anunione, e mo s’hanno affittata na casa nzieme, e aperto lo niozio, a lo vico de lo Sole. Sentite come s’hanno apertuta sta casa. Comme trase truove na cammarella nera nera co no fenestiello per ll’aria, e attuorno attuorno nce stanno appese l’evere per li ngiarme, nce sta lo jusquiamo e la cambomilla pe sanà ogne dolore de matra. Nce sta mmiezo na fornacella de fierro chiena de ggravune, co tanta sierpe d’ogne mesura che sciosciano lo fuoco pe fa vollere lo decotto dinto a no pezonetto stagnato che nce sta ncoppo. Stace no giovane de speziale che vota la bobba co na cocchiarella de cuorno de vufara e se chiama Agosteniello Mbomma. Trase cchiù dinto, e truove n’antecammara tutta bella pittata e co tanto no lampiero appiso mmiezo; ma ste belle pitture so nguacchiate de rasche, de manere ca chi nce trase s’have da sta attiento pe non se nasprà li vestite. Si quaccuno vo essere addevenata la ventura ha da presentà una mammoria a lo capo ngiarmatore, che tene a capa comm’a vorriello e dì gamme notrzate, che pareno varrile. Nnì che chisto lloco have ntennuto chello ca vuò essere addevenato, accommenza a fa lo ngiarmo, se gratta la capa e se mette n’canna no collaro guarnuto de pelle de coniglio capomazzo, po se sguarra ncopp’a na vrasera chiena de gravunelle, e accommenza a rusecà mutte bernische; apre lo liberetiello janco, e dice che te vole fa ricco si tiene denare assai; s’arreposa e se mette n’capa na giorlanna de lauriello e de fronne de vigne; chiamma Mbomma, se fa portà no piatto chino de sauza piccanta, e se mette a magnà co la soleta cucchiarella de cuorno de vufara; s’annetta lo musso, se fa caccià na carta de Barbaria, e spalefeca lo nommo de n’Aroe pajesano. Fa no sisco, e vide ascì da sotto a na cascetta duje canille arraggiate, ma che lo ngiarmo fa paré cianciuse. ...................

Masto Libò, viata chella mamma che te facette: se vede propeto ca saje fravecà pulito a sto curzo de via nova a l’ausanza de l’antiche Romane. E lo vero ca lo ngigniero e lo screvano s’hanno penzato de t’appilà la vocca co sta palata de pane muscio, pe non fa dà la voce a li guagliune c’ancappano le prete a lo manganiello, ma è lo vero purzì ca tu da viecchio cane guardiano non te sì stennuto a lo sole pe te la menà n’canna: la tiene pesola pesola mpont’a li diente, vuote ll’uocchie attuorno, murmuliie e truone n’cuorpo, e non t’arresulisce de nce dà no muorzo pecchè non si frabutto e manco magna magna o secuteme chisso; sì de taglia antica e de core apierto: e pecché staje a panza sazia, guancie ma non te chiave ncuorpo sta scorza co la merca, abbrusciata e chiena de vrenna; puorte nnanze l’opera e magne pane de lo meglio sciore de Farina. Ebbiva masto Liborio.