Caffettiere: Mannaggia tutte ll’uommene che non teneno parola! E comme, neh, Mast’Aniè? Nce aje abbandonate? Che bonora è; non te si fatto vedè cchiu? Mezarecchia: Ppi! Amante povere, amice perdute. Mast’Aniello s’avarrà fatte li denare e pecchesto ..... Ciabattino: Iavete a fa ....... mo si, che ve nce mannaria Foregrotta ........ Io sto co li cancare ‘ncapo e buje me stuzzecate appriesso. Mezarecchia: Ch’è stato? Che t’è socciesso? Ciabattino: E che m’ha da soccedere! E’ meglio che non chiacchiarejo, ca sto co lo beleno a lo musso, e si chiavo no muoro a uno mme faccio venì lo naso mmocca ...... Caffettiere: Mast’Aniello mio, non te ‘ntossecà cchiù; teh, vivete sta presotta de spireto de vrovine, e accònciate la vocca. Sbafa, sbafa co nuje; ca te sentarraje alleggerì lo stommaco. Ciabattino: E ca pe sto sbafà che aggio fatto co buje io sto co na persecuzione ‘ncuollo de nova specie. Io non saccio che mìè socciesso. Chi mme vo fa, chi mme vo dì, chi m’abbotta de maleparole da cca, chi m’ammenaccia da llà ..... e pecché, neh, e pecchhé?? Ca io parlo troppo ch aro e dico la veretà comme mme sento. E sto parlà sinceroha ‘ntoppato lo naso li nemice de la veretà, a li cuorpe de ‘mpostura e de boscia. Caffettiere: Uh! Mmalora! Io sentette parlà de na cosa; che saccio ..... de no sciabacchino che era stato secotato la semmana passata pe Toledo; ma non poteva maje ‘mmagenereme ca tu jere sto sciabacchino. Ciabattino: Fuorze volarraje dì Ciabattino? Caffettiere: Se, se Ciab ... Ciabattino!! Se, se!! ... ma tu che nce aje che spartere? Tu si solachianiello e non Sciabattino .... Ciabattino: E solachianiello e ciabattino è la stessa cosa .... Nzomma pe te fa capace, so stato io, che aggio passato tutto chesto, pecché ca parlo ‘nfaccia e chello che aggio da dì a uno non ce lo mmanno dicenno. Mezarecchia: Povero Mast’Aniello! Mme dispiace ca pe bia nosta ... ma chesto non mme fa capace: doppo che tu avisse fatto male a parlà, me pare ca nce sta la legge, e la legge (comme sentette di quanno io era Calibardino) è eguale pe tutte! Pecché addonca non se fa sta legge pure per tte, senza fa tanto chiasso e tanto rommore? Caffettiere: Ma caro Mast’Aniello, ll’aje voluto tu, agge pacienza! Tu chiacchiarie sempe comme a no riazionario, pecché cierte cosarelle sarria meglio a non dirle, e tu a lo contrario parle, parle e parle senza riguardo. Ciabattino: Nzomma la libertà de la stampa pecché nce stà? Forze per dicere solamente chello che buò tu o chello che bò Mezarecchia? Embé, tu dice ca lu governo borboneco era tiranno pecché non boleva fa parlà liberamente, pecché voleva che tutte quante avessero penzato de una manera, e che mo ognuno po dì li sientimente suoje senza paura de ji dint’a le quarantaquatto? E si io non pozzo parlà commme mme lo sento, ‘nche consiste stà libertà d’opinione? Caffettiere: ma tu a le bote parle troppo arraggiuso. Ciabattino: Chi magna fa mollica, se sole dì. E se io compatisco a ll’autre che te jettano cierte chacchune che meretarriano d’essere ‘mpise, non cìè niente de male che non se jesse tanto trovanno lo pilo dint’aa ‘lluovo co mmico, che so poveriello sì, ma cetatino libero comm’a tutte quante ll’autre; e si parlo, parlo ca nne tengo ragione da vennere, pecché mme veco affritto e paccariato senza averence nisciuna corpa. Veco la patria mia arredotta de sta sorta de manera, appezzentuta, sfavecata, annabbessata, e pecché? pecché? E bolite che io mme sto zitto e dico che tutto va buono? Non sarrà maje! Io desidero che la patria mia fosse felice, che tutte stessero contiente, che non ce stessero ‘ngiustizie, che ll’uommene fossero frate, ma veramente frate, frate fedele comm’a Abele e no comm’a Caino..... (Dal giornale "Il Ciabattino")